An kreyòl : 11 moun pèdi lavi yo, 7 lòt disparèt nan yon aksidan bato nan peyi Nijerya

Gen o mwen 11 moun ki pèdi lavi yo aye vandredi a nan yon aksidan bato nan zòn Bukuru nan peyi Nijerya ki twouve’l nan Afrik Lwès. Daprè sa otorite nan peyi sila fè konnen jodi samdi a.

Pòt pawòl NIWA ki responsab sa ki gen pou wè ak navigasyon sou lamè a konfime ke gen 7 lot moun ki te nan bato a ke yo pa jwenn. Li di ke gen 12 nan pasajè yo sekouris yo te rive sove lavi yo. Sekouris yo toujou ap chache 7 lòt moun yo. Yon lòt responsab nan peyi sila fè konnen ke bato a te twò chaje , li te pote 30 moun, epi pa gen youn ladan yo ki te gen jile sovtaj.

Li ale pi lwen, kote li fè konnen ke bato ki fè aksidan an te fèt pou pote machin, men mèt li te transfòme li ilegalman pou li ka fè trafik avèk li. Sa ki lakòz 11 moun pèdi lavi yo e 7 lòt disparèt.

• Atik sila pibliye nan « Lang Kreyòl Ayisyen » yon fason pou selebre jounen 28 oktòb la, ki se : Jounen Entènasyonal Lang ak Kilti Kreyòl.