Egzamen bakaloreya: Ministè Edikasyon Nasyonal ak Fòmasyon Pwofesyonèl (MENFP) enfòme gen 4 sant egzamen li deplase nan Pòtoprens lan.
Ministè Edikasyon Nasyonal ak Fòmasyon Pwofesyonèl nan yon nòt li mete deyò jodi jedi 30 jen 2022 a fè konnen li deplase 4 sant egzamen nan zòn metwopolitèn Pòtoprens lan.
Sant egzamen ki te nan lise Jan Jak Desalin, kandida yo, siveyan ak sipèvizè yo ap gen pou ale kolèj Sen Lwi Boudon paske se la sant sa transfere daprè nòt la.
Sant egzamen lekòl Nasyonal Repiblik Paragwey transfere tou nan kolèj Sen Lwi Boudon.
Sant egzamen lekòl Nasyonal Repiblik Brezil transfere nan kolèj Jean Price Marc ki nan riyèl Kretyen, zòn Lali epi sant egzamen enstitisyon Notre-Dame de Lourdes transfere nan lekòl Nasyonal Repiblik Etazini ki Kanapevè.
N ap raple nan kad yon konferans yè mèkredi a, otorite Ministè yo anonse tout bagay pare pou fasilite bon jan dewoulman egzamen bakaloreya k ap fèt sou tout teritwa a soti vandredi 1e pou bout mèkredi 6 jiyè kote 115 337 kandida ap patisipe nan eprèv yo.
Daprè chif BUNEXE mete deyò nan kad konferans sa, 48% nan kandida sa yo se nan depatman Lwès la yo soti avèk yon chif ki se 56 213 elèv. Latibonit vin an dezyèm ak 12 249, Nò vin an twazyèm ak 11 722 elèv. Depatman Nip se li ki bay pi piti kandida avèk yon chif ki se 3 536 elèv. Ministè a mete 572 sant egzamen pou akeyi elèv yo.
