Konfli ki egziste ant gwoup gang anndan komin Site Solèy lakoz pou pi pita 4 moun mouri pami yo yon fanm ansent ak anpil blese.
Yon bilan lou daprè eksplikasyon Pastè Enock Joseph
Dram sa pase lendi 26 avril la, kote 2 gwoup gang ki t ap afwonte lakoz plizyè moun viktim ki te twouve yo anndan kamyonèt. Pastè Enock Joseph ki se yon notab anndan komin lan t ap pale sou radyo Kiskeya pou eksplike epi deplore sa k pase a.
Pastè a ki gen Ministè Pastè Enock ki trè popilè nan site a deklare: “Se yè lendi a, vè 10 è nan Kafou Brooklyn, mesye anwo yo tire sou 2 kamyonèt, ladan yo gen anviwon yon dizèn moun ki pran bal, gen 3 moun ki mouri sou plas pami yo yon fanm ansent, gen moun k al mouri lopital”.
Fas ak aksyon sa ki pase a, Pastè Enock pa kache santiman l pou fè konnen anndan l manje l lè l ap gade sa k pase a epi fè konnen li kondane zak sa
“Lè w tire sou 2 machin, 2 kamyonèt k ap pote moun sivil 2 bra balan ki pa gen anyen kòm defans, sa li manje tout anndan m epi li fòse m denonse, revòlte, endiye kont zak sa ki pase a epi nou kondane l”.
Afwontman 2 gwoup gang
Pi lwen nan detay li yo, notab la fè konnen sa k ap pase a se yon batay gwoup gang anwo kont gwoup gang anba ki la depi 2 lane depi aprè lanmò Ti Ougan. Anwo se katye Boston ki gen lòt katye alye avèk li, anba se katye Brooklyn ki gen lòt katye avè l tou, si n kwè eksplikasyon pastè a ki te nan mikwo Kiskeya.
Kiyès ki dèyè gwoup sa yo?
Nan detay li yo pastè a pa t vle site non chèf gang k ap jere blòk anwo ak anba. Li te pito jete responsabilite a sou do moun anndan Leta yo li di ki deside kite zam nan men moun sa yo.
Li pa t vle tou devwale okenn non moun oubyen sektè ki ta gen men kache dèyè sa k ap pase yo. Toutfwa li estime avan sa se te pou kesyon klan politik, koze elektoral, elatriye…
Dekouvri plis:
68 congressmen demandent à Joe Biden de dire NON aux élections et au référendum programmé par Jovenel Moïse
