Emiliano Martinez jwe yon gwo wòl nan siksè Ajantin anndan Kopa Amerika a

Emiliano Martinez, youn nan “bwa dèyè bannann” ekip Ajantin lan pou nouvo tit Kopa amerika

Emiliano Martinez, 28 lane, se pa anpil moun ki te konn gadyen sa. Anpil moun vin plis dekouvri l epi gen lanmou pou li anndan konpetisyon Kopa amerika a, sitou nan demi final kont Kolonbi.

Bò kote Messi, Otamendi, De Paul, Angel Di Maria, gadyen sa trennen Ajantin ale pran yon nouvo tit apre 28 lane yo pa t janm ranpòte konpetisyon majè sila.

Fòs ak kouraj li pèmét li pwogrese epi rive ranpòte Kopa a

An 2010, li te gen 17 an, li te rejwenn ekip Arsenal la. Gadyen sa pase 10 lane (2010-2020) ap siye ban ekip Arsenal la kote pou 10 an sa li jwe 38 match sèlman.

Arsenal te kontante prete l nan anpil lòt klèb tankou Oxford United li jwe yon grenn match, Sheffield Wednesday li jwe 15 fwa, Rotheram United, Worlverhampton, Getafe li jwe 7 fwa, Reading. Tout klèb sa yo, Arsenal te kontante prete l jistan li ale nan Atson Villa sezon pase.

Nan Atson Villa, pou sezon pase li jwe 38 match epi pèmèt klèb sa fini 11è epi fini pami meyè gadyen nan Premyè Lig la. Se la tou, chans pote koulè Ajantin lan ta pral vini pou li epi l ta pral deklare li vle ranpòte konpetisyon an ak peyi l epi pou Messi (pwomès ki reyalize).

Nan demi final fas Kolonbi li kenbe twa penalite ki pèmèt peyi l ale nan final. Apre match sa, popilarite l te ogmante sou rezo sosyal yo tèlman moun t ap chache l tout kote pou follow li epi fè rechèch sou li.

Yè swa nan final la kont Brezil, li te trè desizif, li fè plizyè arè ki sove Ajantin epi bay peyi l dwa ranpòte twofe a pou yon 15èm fwa. Li fini meyè gadyen tounwa a tou.

Yon viktwa ki ba l anpil respè nan je fanatik Ajantin ak moun ki renmen epi ki konn foutbòl.

Non konplè li se Damían Emiliano Martinez Roméo. Li fèt 2 septanm 1992, nan Mar Del Plata peyi Ajantin. Li gen yon wotè 1mèt95.

Li pran koup Angletè ak Community Shield an 2020 ak Arsenal epi Kopa amerika ak Ajantin ane a la.

Dekouvri plis:

5 joueurs de la sélection nationale dont Frantzy Pierrot testés positifs à la Covid-19 avant d’affronter les USA