Etidyan Inivèsite Pòtoprens yo (UP) te mobilize jodi a pou denonse zak kidnapin ki fèt sou youn nan pwofesè yo ki se Abdias Edumé.
Abdias Edumé ki kidnape sa gen anviwon 3 jou po ko ka relache pa ravisè yo ki mande yon sòm lajan. Nan sans sa, etidyan yo te lanse mouvman pwotestasyon an devan lokal inivèsite a bò 9 vè nan maten.
Etidyan yo te pran chèz, biwo ki te anndan inivèsite a epi bloke antre 1e, 2e ak 3e riyèl Rivyè. Blokaj sa te rive menm devan lokal rektora UEH la. Yon mobilizasyon ki te fèt san boule kawotchou anba je prezans polisye ki te vin rive sou plas pou kontwole sitiyasyon an.
Etidyan sa yo, nan revandikasyon yo t ap mande liberasyon Abdias Edumé yo di ravisè yo mande fanmi an 1 milyon dola ameriken, yo t ap rele aba kidnapin k ap fèt yo.
Selon eksplikasyon yon etidyan nou te arive pale ak li apre mouvman sa, li fè konnen polisye yo te mande yo retire barikad yo, men yo te arive pale ak polisye yo pou fè yo konnen se jis yon revandikasyon. Polisye yo te fini pa kite yo revandike, selon eksplikasyon etidyan sa.
Etidyan yo anonse yon mach pou demen samdi 10 zè nan maten k ap demare devan lokal inivèsite a, monte Boudon pou ale devan OPC, ale devan ministè Jistis epi retounen kote mach la te koumanse a.
Juno7 ap souliye pou ou tou te gen gwo mouvman nan Tigwav jodi vandredi 19 fevriye a , kote popilasyon an mande liberasyon pwofesè Abdias Edumé.
