Rutshelle remèt Messi kou a

Rutshelle Guillaume remèt Lionel Messi kou a pou Brezil ak Pòtigal (Bretugal).

Atis Rutshelle Guillaume pa sispann fè pale de li depi yè samdi a sou rezo sosyal yo aprè li fin pran pri “Meyè atis karayibeyen” nan seremoni Trace Awards 2023 ki t ap òganize nan peyi Rwanda nan vil Kigali. Jodi dimanch 22 oktòb la, diva a ki se gwo fanatik Cristiano Ronaldo pibliye yon foto kote li kouche ak twofe li epi l ap dòmi. Menm pòz jan Lionel Messi te fè aprè l te fin chanpyon mondyal avèk Ajantin nan peyi Kata. Yon foto ki vrèsanblableman enspire atis la ki fè anpil entènot ap kòmante, like ak pataje. Pandan li fè konnen se yon revanj pou Brezil ak Pòtigal (Bretugal).

Foto Rutshelle la pibliye bò 10 è nan maten. Kèk tan aprè li vin soti nan seremoni Trace Awards la. Gen moun ki fè blag ak foto a pou di atis la ap kopye Messi, gen lòt ki panse se kou a li remèt Messi paske li se gwo fanatik Cristiano Ronaldo. Men sa ki enpòtan chantèz la gen twofe l tou nan men l pou l admire epi deklare nan yon lòt pòs li fè se revanj li fè pou Bretugal, yon tèm ayisyen itilize pou pale de Brezil ak Pòtigal.

N ap raple Rutshelle Guillaume pran twofe sa pandan l te nan konkirans ak Kalash, Bamby, Princess Lover, Admiral T, Shenshea, Popcaan ak Maureen.

Fò n raple tou pwodiktè ayisyen an Michaël Brun pran pri Meyè DJ. Yon twofe Uncle Waffles, DJ Spinall, Danni Gato, DJ Bdk ak DJ illans t ap goumen pou li tou.

Pri sa yo montre nan ki nivo Rutshelle Guillaume ak Michaël Brun ap mete mizik ak kilti ayisyen anvalè epi montre yo nan yon lòt dimansyon nan sektè a.

Dekouvri plis:

Trace Awards 2023: Michaël Brun «Best DJ», Rutshelle Guillaume «Best Caribbean Artist»