Anbasad ameriken prezante bay MENFP 2 pwogram sou ansèyman lang, syans ak edikasyon

Anbasad ameriken an Ayiti prezante bay minis Edikasyon Nasyonal la Nesmy Manigat 2 pwogram patenarya sou ansèyman lang, syans ak edikasyon sou anviwònman.

Atache kiltirèl Anbasad ameriken an nan Pòtoprens, Wiliam Bellis ki te akonpaye ak Romuald Zamy, te rankontre ak minis edikasyon nasyonal la Nesmy Manigat yè mèkredi 30 mas 2022 a, nan lokal Enspeksyon Jeneral Administrasyon Edikasyon Nasyonal la ki chita kò l nan Miso, sou wout Boudon an. Rankont sa se nan kad 2 pwogram koperasyon Anbasad ameriken an te vin prezante ak minis lan.

Youn nan pwogram yo gen pou wè ak amelyorasyon ansèyman anglè nan lekòl yo selon sa yon nòt ministè a met deyò fè konnen. Selon eksplikasyon yo, pou pwogram sa arive fèt, gen yon mekanis MENFP ak Anbasad la ap mete an plas kote y ap gen pou seleksyone yon premye gwoup anseyan sètifye pou pwogram lan ki dwe sòti nan tout Direksyon Depatmantal Edikasyon yo, selon sa nòt la fè konnen.

Pi lwen, nòt sila eksplike pou l di kowòt sa pral swiv yon fòmasyon entansiv lòt bò dlo aprè y ap retounen pou vin reprann fòmasyon sa pou lòt anseyan yo. Nòt la baze l sou eksplikasyon Williams Bellis.

Minis Nesmy Manigat sou bò pa l akeyi pwogram patenarya sa. Selon sa l di, pwogram sa pral devlope nan kontèks refòm kourikoulòm lekòl la sòti nan preskolè pou bout nan segondè.

Dezyèm patenarya a dwe chita sou pwogram “Globe” ki se yon pwogram ki pou kreye vokasyon pwofesyonèl. Selon detay yo, pwogram sa la pou chèche devlope enterè kay elèv yo pou syans ki gen rapò ak anviwònman. Pwogram sa gouvènman ameriken an lanse li depi 1995, li touche plis pase 30 mil anseyan k ap travay nan plis pase 30 mil lekòl nan 119 peyi nan mond lan.

Minis Manigat akeyi dezyèm pwogram lan ak menm enterè a selon sa nòt la fè konnen.

Rete kounya pou pwogram sa yo demare epi gade ki rezilta yo ka pote. Toutfwa, n ap fè w konnen gen lòt echanj ki dwe fèt ant Ministè a ak Anbasad Ameriken pou sa ki konsène pwogram Globe la ki ka pèmèt yo debouche sou siyati yon memorandòm.

Dekouvri plis:

Décès de la chanteuse haïtienne Yanick Étienne