Kwadèboukè: Lapolis demanti enfòmasyon ki fè kwè yo gen anpil ajan ki blese

Yè samdi a sant vil komin Kwadèboukè te enpratikab anpil apre echanj anpil kout zam ant lapolis ak nèg baz 400 Mawozo.

Sou rezo sosyal yo, anpil pòs te lèse kwè gen plizyè polisye ki nan difikilte nan kad operasyon, gen moun ki te menm panse polisye yo pran nan sa k te rive ajan SWAT yo nan vilaj de Dye. Lapolis soti yon nòt rapid pou demanti enfòmasyon sa yo epi kalifye yo de rimè. 

Selon enstitisyon polis la, operasyon samdi 18 septanm lan se pou deloje bandi k ap teworize popilasyon Kwadèboukè a. Si enfòmasyon ki t ap kouri yo di gen anpil polisye ki blese, nan nòt la PNH la presize se yon sèl ajan l ki touche pa bal nan bra li. Epi fè konnen yo te pran dispozisyon mennen li lopital epi rasire ke eta sante l estab.

Pi lwen nan nòt sa, lapolis anonse gen dispozisyon ki pran pou ranfòse prezans lapolis nan zòn Kwadèboukè a. Yon zòn ke bandi fin achte lajan kontan ki mete sitwayen komin sa ak lòt moun ki abitye frekante l nan anpil tèt chaje. 

*Sa k te pase yè samdi nan Kwadèboukè*

Redaksyon jounal la aprann tou ke nèg baz 400 Mawozo yo te debake pou ale enstale yon chèf gang nan baz ansyen chèf gang Depòte. Se nan moman sa lapolis te vin rive epi debake sou yo. Anpil kout zam te chante paske nèg yo t ap fè rezistans fas ak polisye yo, selon sa yon sous polisyè fè konnen. 

Lapolis arete 2 chofè nèg 400 Mawozo ki t ap kondi kamyon fatra, gen bandi ki tonbe si n kwè deklarasyon menm sous polisyè sa.

Fenomèn ensekirite a ap vale teren tout kote anndan peyi a. Sa ki mete popilasyon an nan ti soulye l fas ak bandi k ap enpoze lwa yo chak jou ki jou.

Dekouvri plis:

Migration et aide au Grand Sud: les priorités de Claude Joseph au CELAC