Sektè Demokratik la mande popilasyon an kanpe bò kote polisye yo jouk yo rive jwenn kadav ajan bandi yo te asasinen Vilaj dedye yo.
Nan yon nòt pou laprès ki soti jodi 17 mas la, Sektè Demokratik Popilè a renouvle sipò l bay Polisye yo, sitou sila ki daprè li, ap travay nan move kondisyon pou bay pèp la timoso sekirite. Nan dokiman sa a ki pote siyati ansye senatè Ricard Pierre, Anthonio Cheramy ak Nenel Cassy; ansyen majistra Rony Colin, mèt André Michel ak ansyen minis Marjory Michel, Sektè Demokratik ak Popilè a di l kondane konpòtman Direktè jeneral Lapolis la, Léon Charles ki daprè estrikti sa a, mete ajenou nan pye Bandi yo pou Lapolis te ka rejwenn cha blende Bandi yo te kenbe a.
Pou Sektè Demokratik ak Popilè a, se yon demach lawont lè yo konsidere Kadav Polisye yo Asaninen yo nan Vilaj la toujou nan men bandi yo ki daprè SDP a, fè gwo alyansay ak rejim PHTK nan lide pou l kapab kenbe Pouvwa a sou San pèp la nan Kontinye vyole Konstitisyon ak lwa peyi a.
“Sektè Demokratik e Popilè a Mande Popilasyon an nan 4 kwen peyi a Mobilize, kanpe ak Polisye Nou yo jouk Nou rive Jwenn kadav polisye yo pou fanmi yo ka antere yo nan diyite”,pandan l raple Léon Charles ak Jovenel Moise se 2 prensipal responsab Sak pase nan vilaj dedye a paske daprè li, G9 Babekyou ap dirije a se Jovenel Moïse, Michel Martelly ak Tout mesyedam PHTK yo Ki kreye li.
Pandan l kondane yon lòt fwa ankó Zak asasinay Ki te fèt nan vilaj dedye sou 5 jèn Polisye jou ki te vandredi 12 Mas la, Sektè Demokratik e Popilè fè konnen”Toutotan PHTK sou Pouvwa a, Bandi ap Kontinye taye Banda, Polisye ak pèp la ap Kontinye Viktim”.
