Si pou anpil gason kesyon jere vant plat, ale nan gym, ka fè yon fi plis atire nan yo. Yon etid ki reyalize nan peyi Angletè ale nan sans kontrè a epi fè kwè 75% fi plis apresye nèg ki gen gwo vant.
Etid sa se yon sit rankont ki rele Dating.com ki te reyalize l epi releye pa sit Insider. 75% moun yo entèwoje yo fè konnen se moun gwo vant yo renmen. Nèg lè yo met chemiz oubyen mayo pou vant lan layite ladan l.
Malgre etid sa, kesyon pwa ak fòm moun pa ta dwe sijè deba
Sa pa vle di yon moun k ap fè espò pou brile anpe grès se kòve l ap fè. Dayè gen yon jan w ap fè espò, ou anfòm, ou parèt krakan kit se yon fi oubyen gason k ap fè aktivite fizik sa.
Nou ka ale pi lwen pou n di kesyon fòm ak pwa moun pa dwe gen deba. Depi moun lan santi l alèz nan po l ou pa ka vle fè l tounen yon pwoblèm pou li nan di l: « Gad jan w mèg », « ou gwo twòp », « bouboul », « jere seksi ». Lè sa ou riske blese moun lan san rann kont oubyen volontèman nan plede jete kòmantè sou gwosè l. Nou konn menm ale pi lwen pou di zopope, gad gwosè yon ladjablès elatriye…
Toutfwa yon moun ka twouve li nòmal pou li pou fè rejim, pou kase vant si l santi se nesesè pou li men se pa fòse yo dwe fòse l oubyen presire l ak move blag sou gwosè l. Sit Santeplusmag konseye moun ki vle pèdi pwa pou manje fwi ak legim ki gen anpil fib, fè aktivite fizik, pa konsome twòp manje ki gen pil sik, pa bwè gazez…
Men pa etone si yon gason di w kite vant li monte, kite l pran pwa paske li aprann 75% fanm renmen nèg ki konsa. W ap jwenn sa wi! Lè sa ou pa dwe kritike l.
Dekouvri plis:
